BANTILÁW
bihirang gamitin / ang lumang salitâ
sa panahon ngayon, / ngunit sa balità
sa dyaryo'y nabása / aba'y anong rikit
salitang "bantiláw" / sa isports ginamit
kayâ inalam ko / sa Diksiyonaryong
Adarna kung anong / kahulugan nito:
di sapat ang init / ng apoy sa kalan
upang makaluto / ng kanin at ulam
di rin daw masinop / ang pagkakagawâ
na kapag bantiláw, / madaling masirà
kumbaga, ginawa'y / di pala pulido
maiinis ka lang / pag ginamit ito
maraming salamat / at kalugod-lugod
wikang Filipino'y / naitataguyod
nang itong "bantiláw" / nabása sa ulat
may bagong salitang / sa atin nagmulat
- gregoriovbituinjr.
12.24.2025
* pamagat ng ulat sa isports ng pahayagang Bulgar: "Ancajas Nabantilaw ang Title Eliminator Dahil sa Injury", DIsyembre 24, 2025, p.12
Walang komento:
Mag-post ng isang Komento