BATANG ISANG TAON, NALUNOD SA TIMBA
nakakaiyak, nakakagitla
nang mabasa ang isang balita
isang taong gulang lang na bata
yaong nalunod sa isang timba
biktima umano'y naglalaro
sa likod-bahay, ngunit naku po!
buhay niya'y kay-agang naglaho
pangarap sa kanya'y nagsiguho
nasabing bata'y napabayaan
habang magulang ay nag-agahan
timbang may tubig ang nilaruan
ng bata't siyang kinalunuran
kung ako ang ama'y anong sakit
na habambuhay kong mabibitbit
may pangarap pa ang aking paslit
ngunit nangyari'y sadyang kaylupit
- gregoriovbituinjr.
01.23.2025
* ulat mula sa mga pahayagang Abante at Bulgar, Enero 23, 2025, pahina 2
Walang komento:
Mag-post ng isang Komento