PAGTITIG SA KISAME
minsan, nagninilay pa rin sa hatinggabi
naroroong nakatingala sa kisame
mata'y mulat na sa isip may sinasabi
nakatitig sa kawalan, anong mensahe
marahil ay naghihintay pa rin ng antok
di makatulog, nangangagat pa ang lamok
kanina lamang sa pagkilos ay kalahok
na sigaw ay ibagsak ang sistemang bulok
ano bang meron sa kisame kundi agiw
o marahil hindi, may larawan ng giliw
at naiisip ang pagsintang walang maliw
tulad ng makatang sa mutya'y nababaliw
minsan, kisame ang kasangga sa umaga
doon ibinubulong ang mga problema
doon kinakatha ang mga nakikita
hanggang susing kataga'y ibunyag ng musa
- gregoriovbituinjr.
03.05.2024
Walang komento:
Mag-post ng isang Komento