aking pinanood ang pelikulang Liway
hinggil sa isang kumander ang talambuhay
na nangyari sa panahong di mapalagay
yaong bayan sa diktaduryang pumapatay
lalo ngayong nagbabanta ang pagbabalik
ng halimaw ng norte't takot ay ihasik
baka muling ilublob ang bayan sa putik
pag nanalo ang palalo't sukab na lintik
makatotohanang pagtalakay ang sine
sa panahon ng Buwan ng mga Babae
mga gumanap ay kayhuhusay umarte
kwento'y malalim, matalim, may sinasabi
huwag nating hayaang bumalik ang sigwa
ng panahong karapata'y binalewala
na mga nakibaka'y dinukot, winala
habang halimaw ng hilaga'y nagwawala
di dapat bumalik ang malagim na araw
sa likod ng bayan, may tarak na balaraw
nais nating payapa pag tayo'y dumungaw
na sana'y lipunang patas ang matatanaw
- gregoriovbituinjr.
04.03.2022
Walang komento:
Mag-post ng isang Komento