Pluma ko'y bakliin mo man

nais kong maramdaman nilang kahit sa sulatin
na di ako nag-lie low, pagkilos ko'y tuloy pa rin
nasa kwarantina man, ginagawa ang tungkulin
komentaryo't tuligsang tula ang palipas hangin

patuloy na nakikiramdam at di humihimbing
sa problema't isyu ng masa'y nanatiling gising
diwa ng dalita'y katha, wala sa toreng garing
sa manggagawa't maralita laging nakakiling

di natutulog kahit sa karimlan itong pluma
upang magpaliwanag, tumuligsa o pumuna
lumalaban sa pang-aapi't pagsasamantala
sa akda nilalarawan ang sakripisyo't dusa

pluma ko'y bakliin mo man, patuloy sa pagsulat
pintig ng puso't daloy ng diwa'y di maaawat
magpapatuloy pa rin sa gawaing pagmumulat
wala man sa kalsada'y tangan pa rin ang panulat

- gregbituinjr.