Pabahay

PABAHAY

kayraming nakatenggang tahanan

habang kayraming walang tirahan

bakit ba ganyan? anong dahilan?

karapatan ba'y pinabayaan?

mga tanong ng dukha'y ganito:

kung pabahay ay karapatan mo, 

karapatan ko't ng bawat tao

ay bakit ito ninenegosyo?

kayraming bahay ang nakatengga

upang pagtubuan at ibenta

sa mga nagtatrabahong masa

di sa walang bahay, walang pera

kung ganyan pala, sistema'y bulok

dahil mga dukha'y di kalahok

negosyo'y tuso, tubo ang tarok

karapatan na ang inuuk-ok

masdan ang mga dukha sa atin

pera'y di sapat kung iisipin

kung magkapera, una'y pagkain

nang pamilya nila'y di gutumin

karapatan natin sa pabahay

ay naukit na sa U.D.H.R.

pati na sa I.C.E.S.C.R.

pagkat bahay ay buhay at dangal

karapatang balot ng prinsipyo't

tinataguyod nating totoo

ika nga: "Pabahay ay serbisyo!"

dagdag pa: "Huwag gawing negosyo!"

patuloy na ipaglaban natin

ang karapatang dapat angkinin

makataong pabahay ay kamtin

dignidad itong dapat kilanlin

- gregoriovbituinjr.

08.31.2021

- litratong kuha ng makatang gala sa tapat ng opisina ng paggawa

* U.D.H.R. - Universal Declaration of Human Rights

* I.C.E.S.C.R. - International Covenant on Economic, Social, and Cultural Rights

Ang pusa

ANG PUSA

kumusta ka na, Pusa, anong iyong kailangan?

tila baga muli kang kumakatok sa pintuan

marahil ay naamoy mong pritong isda ang ulam

sandali, hintay lang, at ikaw ay aking bibigyan

siya ang pusang madalas makitulog sa gabi

sa tabi ng bintana, taas ng eskaparate

minsan sa ginagawa ko'y tahimik siyang saksi

habang naglalamay ng kung anong akda't diskarte

madalas akong maunang gumising sa umaga

maya-maya, tanaw ko nang nag-iinat na siya

ah, mabuti nang may pusa dito sa opisina

may panakot sa malalaking daga sa kusina

minsan sa ilalim ng sasakyan siya tatambay

tila baga doon ang palaruan niyang tunay

minsan pag nananghalian ako, siya'y kasabay

at pag nagsusulat ay nakakawala ng lumbay

- gregoriovbituinjr.

08.31.2021

COVID

Dalawang pinsang buo ko at tiyahin ko (nanay nila) ang sabay-sabay na namatay sa COVID sa probinsya: sina Kuya Esmer Bituin, Ate Evelyn Bituin-Alipio, at Inay Charing Bituin.

Kumatha ako ng soneto (tulang may labing-apat na taludtod) bilang alay at pagninilay:

COVID

nakabibigla, dalawang pinsang buo't tiyahin

ang sabay na nangawala dahil sa COVID-19

noon, kapag nauwi ng probinsya'y dadalawin

silang kamag-anak kong sadyang malapit sa akin

si Kuya Esmer sa pabrikang PECCO'y nakasama

ko ng tatlong taon bilang regular sa pabrika

si Ate Evelyn nama'y palakwento't masaya

maalalahanin si Inay Charing, aking tiya

wala na sila, wala na, nahawaan ng COVID

tinamaan ang nanay at dalawang magkapatid

mag-ingat tayong lahat sa nananalasang sakit

tunay ngang virus na ito'y sadyang napakalupit

pagpupugay sa mga kamag-anak na nawala

salamat sa buti ninyo't masasayang gunita

- gregoriovbituinjr.

08.31.2021

Nawa'y makita pa sila

NAWA'Y MAKITA PA SILA

(August 30 is International Day of Disappeared)

kanina sa webinar ng FIND ay dumalo ako

dahil daigdigang araw ng desaparesido

ngayon, kaya pinakinggan ko ang naritong isyu

nakinig ng pananalita sa usaping ito

makabagbag-damdamin ang bidyong ipinalabas

tungkol sa masayang pamilya subalit dinahas

nang kuya'y dinukot, winala ng kung sinong hudas

pangyayaring ang kawalang hustisya'y mababakas

ako'y nakikiisa sa paglaban nilang tunay

habang akin ding nadarama ang sakit at lumbay

ako'y kaisa upang makita ang mga bangkay

ng mga desaparesidong dinukot, pinatay

kaya naging adhika ko nang kumatha ng tula

sa usaping desaparesido o iwinala

ilang taon na ring commitment na ito'y ginawa

bilang bahagi ng pagsisilbing tapat sa madla

Agosto Trenta, International Day of Disappeared

at Araw din ng mga Bayani, ito'y di lingid

taunang gunitang araw na sa puso'y naukit

sa paghanap ng mahal sa buhay, mga kapatid

seryoso akong nakinig sa mga inilahad

sadyang dama kong krimeng ginawa sa buto'y sagad

sana, bangkay ng mga iwinala'y mailantad

pagpupugay sa mga kasama sa FIND at AFAD

- gregoriovbituinjr.

08.30.2021

* litrato mula sa dinaluhang webinar hinggil sa mga desaparesido

* FIND - Families of Victims of Involuntary Disappearance

* AFAD - Asian Federation Against Involuntary Disappearances

Pitong tanaga sa Pagkasilang ng Bansa

PITONG TANAGA SA PAGKASILANG NG BANSA

1

sinilang ng Agosto

ang bayang Pilipino

noong Katipunero

ay nag-alsa ng todo

2

pagkasilang ng bansa't

tandaan nating pawa

nang kababayan, madla'y

naghimagsik ngang sadya

3

ang sedula'y pinunit

dayuhang panggigipit

ay tinapos nang pilit

paglaya'y iginiit

4

eighteen ninety six iyon

at Agosto pa noon

nang isilang ang nasyon

Pinoy ay nagkatipon

5

ang buong Katipunan

na nag-alsang tuluyan

ay mula sa samahan

naging pamahalaan

6

mabuhay ang pagsilang

nitong Lupang Hinirang

mananakop na halang

ay ipinagtabuyan

7

ito'y gintong historya

na bansa'y malaya na

ituro sa eskwela

ang tagumpay ng masa

- gregoriovbituinjr.

08.30.2021

* litrato mula sa pampletong "Andres Bonifacio: Buhay at Pakikibaka" na inilathala ng LKP, PAIS at EILER, pahina 28

Pagkain ng sala sa oras

PAGKAIN NG SALA SA ORAS

di ako ang taong pagdating

ng alas-dose ng tanghali

ay titigil upang kumain

ngayon ka lang kakain, tanong

nila sa akin noong minsan

nang kumain ako ng hapon

ay, ngayon lang ako nagutom

tinapos muna ang gawain

kaya kakain naman ngayon

di ako eyt-to-payb na tao

minsan, kakain ng alas-dos

ng alas tres o alas-kwatro

tuloy lang ako sa paggawa

pagkat alam naman ng tiyan

kung titigil na sa pagkatha

upang kumain, di sa oras

kundi pag wala nang mapiga

sa utak saka lang lalabas

upang kumain sa kantina

lalo na't di nakapagluto

o bumili sa karinderya

ganyan ang karaniwang buhay

ng tulad kong sulat ng sulat

gutom na'y patuloy sa nilay

ngunit dapat pa ring kumain

upang lumakas ang katawan

at upang makakatha pa rin

bagamat kahit ako'y gutom

minsan pagkatha'y uunahin

habang kamao'y nakakuyom

patuloy pa ring nag-iisip

kumakatha't sulat ng sulat

ng anumang paksang mahagip

di ako eyt-to-payb na tao

ngunit huwag magpakagutom

payo sa sarili'y totoo

- gregoriovbituinjr.

08.30.2021

Pakikiisa sa laban ng health workers

PAKIKIISA SA LABAN NG HEALTH WORKERS

sa mga health workers kami'y sadyang nakikiisa

sa isyu nila, sampu ng aking mga kasama

upang itaguyod ang mga kapakanan nila

at kami'y sasama sa kanilang kilos-protesta

ipakita ang matagal na nilang mga hinaing

na ibigay na ang benepisyo nila, gayundin

ang hazard pay nila, allowance para sa pagkain

tirahan, transportasyon, special risk allowance din

anang ulat, nakaraang taon pa hinihintay

ng kanilang benepisyo't allowance na'y ibigay

labing-isang bilyong piso ang kabayarang pakay

sa mga health workers na di pa nabayarang tunay

sobra-sobrang trabaho, kayliit naman ng sweldo

at ngayon, di pa naibibigay ang benepisyo

at allowance kaya protesta na ang mga ito

kinauukulan sana'y tugunan na ang isyu

bagamat di man health workers, nakikiisa kami

sa kanilang kilos-protesta't sasama sa rali

kanilang laban ay aming laban, kami'y kasali

upang laban nila'y ipagwagi hanggang sa huli

- gregoriovbituinjr.

08.29.2021

* litrato mula sa editoryal ng pahayagang PangMasa, Agosto 29, 2021, pahina 3

Sa ika-91 anibersaryo ng Bantayog ni Bonifacio sa Caloocan

SA IKA-91 ANIBERSARYO NG BANTAYOG NI BONIFACIO SA CALOOCAN

taos-pagpupugay ngayong Buwan ng Kasaysayan

na Bantayog ni Bonifacio'y ipagparangalan

inspirasyon ng pakikibaka't paninindigan

upang mapalaya ang bayan sa mga dayuhan

nagpasa ng batas noon itong Lehislatura

na isang pambansang bantayog ay maitayo na

sa kabayanihan ni Bonifacio'y paalala

hinggil dito'y maitayo ang isang istruktura

isang lupon ang tinayo para sa paligsahan

upang bantayog ni Bonifacio'y mapasimulan

magandang disenyo't simbolo ng kabayanihan

ni Gat Andres na namuno noon sa himagsikan

Mil Nwebe Syentos Trenta, Bente-Nwebe ng Agosto

nang mapili'y disenyo ni Guillermo Tolentino

upang maitayo ang Bantayog ni Bonifacio

sa Caloocan na kilala ngayong Monumento

abot apatnapu't limang talampakan ang pilon

limang parte'y limang aspekto ng K.K.K. noon

ang base'y mga pigura hinggil sa rebolusyon

walong probinsyang bumaka'y simbolo ng oktagon

ngayong Agosto Bente Nwebe'y nagpupugay sadya

kay Guillermo Tolentino sa monumentong likha

inspirasyon at kasaysayan sa madla'y nagawa

bilang paalaala kay Bonifaciong dakila

- gregoriovbituinjr.

08.29.2021

Mga Pinaghalawan:

Pampletong "Andres Bonifacio: Buhay at Pakikibaka" na inilathala ng LKP, PAIS at EILER, pahina 47

https://www.pressreader.com/philippines/manila-bulletin/20151130/281779923044961

https://web.facebook.com/pinoyhistory/photos/the-bonifacio-monument-or-monumento-is-a-memorial-monument-designed-by-national-/395411887336520/?_rdc=1&_rdr

Walis

WALIS

walis tambo't walis tingting ay ating nakagisnan

ginagamit upang linisan ang kapaligiran

walis tambo'y ginagamit sa loob ng tahanan

habang walis tingting naman sa labas ng bakuran

parehong walis, magkaiba ng gawa't disenyo

kapwa panlinis ng dumi't alikabok sa inyo

maaari ring gamiting pamalo o pambambo

ni nanay sa mga makukulit na kagaya ko

tambo'y matigas na damo o Phragmites vulgaria

dahon ay tuwid at magaspang at tumataas pa

ng metrong tatlo't kalahati, nasaliksik ko pa

na tingting naman yaong tadyang ng dahon ng palma

mula sa kalikasan ang walis na nagagamit

upang luminis ang paligid natin kahit saglit

panlinis ng basura't tuyong dahon sa paligid

sa anumang agiw sa bahay at diwa'y panlinis

gamit ng ninuno't naukit na sa kasaysayan

nakapaloob din sa samutsaring panitikan

walis tingting sa kwento'y sasakyan ng mangkukulam

walis tambo'y pambambo sa kwentong katatawanan

walis tingting sa kasabihan ay pagkakaisa

walis na gumagawa'y katutubo't magsasaka

matiyagang nilikha upang kanilang ibenta

ng mura basta makakain lamang ang pamilya

- gregoriovbituinjr.

08.29.2021

Tarang magkape

TARANG MAGKAPE

tara, magkape muna tayo, amigo, amiga

lalo't kaysarap ng kapeng barako sa panlasa 

alam mo, kapeng barako'y may klaseng iba't iba:

Arabica, Robusta, Excelsa, at Liberica

tara, tayo muna'y magkape, mga kaibigan

panggising ng diwa, panggising ng mga kalamnan

lalo sa gabi, gising na diwa ang kailangan

naglalamay sa tinatrabaho't mapupuyatan

tara, tayo'y magkape muna, mga kasama ko

habang pinatitibay ang ating mga prinsipyo

tarang magkape habang patungo sa parlamento

ng lansangan at ipahayag ang tindig sa isyu

tara munang magkape dito, mga sanggang dikit

lagyan ng kaunting asukal kung lasa'y mapait

habang sa tinatahak nating landas, ating bitbit

ang pangarap na panlipunang hustisya'y makamit

tarang magkape pag napadaan kayo sa opis

kayo lamang ang magtimpla ng gusto ninyong tamis

habang mga dukha't obrero'y ating binibigkis

habang sa sistemang bulok ay nakikipagtagis

- gregoriovbituinjr.

08.28.2021

Mutyang diwata

MUTYANG DIWATA

tulad ng pangarap ko't adhikain

na bituin sa langit ay sungkitin

Ikukwintas sa diwatang malambing

na nais kong makasama't angkinin

masdan mo ang diwatang sakdal rikit

na hinarana ko sa gawang awit

bituin man ay di ko pa masungkit

ay nagsisikap akong mapalapit

lumipas ang taon, nakamtang sadya

kaytamis na OO ng minumutya

parang matamis na bao sa tuwa

hanggang ikinasal ang puso't diwa

muli akong tumingala sa langit

ah, salamat sa bituing marikit

sa leeg man ng mutya'y di nasabit

labis-labis naman ang pagkalapit

- gregoriovbituinjr.

08.28.2021

Saksakan

SAKSAKAN

matalim ang pagkatitig sa naroong saksakan

upang kuryente'y dumaloy sa tanang kasangkapan

kanina'y kumislap, ito kaya'y overload naman?

kuryente'y namatay at sumindi, anong dahilan?

ah, dapat suriin ang saksakan, dapat ayusin

baka pumutok at magkasunog, tayo'y lamunin

anumang pagkakamali'y di tayo sasantuhin

dapat pag-ingatan ang disgrasyang baka abutin

may saksakan sa kanto, aba'y huwag kang magalit

may saksakan ng ganda, may saksakan din ng pangit

masisikmura mo kaya kung pangit ang lalapit

okey lang, basta di saksakang dugo'y pupulandit

namamatay ang mga gamugamo sa kandila

may namatay din sa mga nasa parang ng digma

makata'y di dapat laging lumulutang ang diwa

tingnan ang saksakan, magsuri, huwag matulala

sa mga ganitong eksena'y magpakahinahon

kaya iyang saksakan ay ayusin mo na ngayon

huwag balewalain, gawan agad ng solusyon

agapan ang disgrasya habang may pagkakataon

- gregoriovbituinjr.

08.28.2021

Daing

DAING

kay-aga-aga'y ano na namang idinadaing?

na ulam na naman ngayong umaga'y pritong daing?

reklamo ng reklamo, aba'y diyan ka magaling!

pulos ka angal, eh, di ka pa nga nakakasaing

tara, inin na ang kanin, masarap pa't malambot

daing talaga ang ulam, huwag nang sumimangot

minsan, nakakatuwa ang sentimyentong pururot

mamaya naman, pag nabusog, ito na'y nalimot

basta ako, isda't gulay lang ang nais almusal

dahil pag karne, yaring bituka ko'y naduduwal

vegetarian na sa katawan ko'y atas at asal

upang makakain ng husay nang di nangangatal

ayos lang kumain ng daing, huwag lang dadaing

ito ang naabutang ulam kaninang magising

kung madaling araw bumangon sa pagkagupiling

sana'y nakabili ng pambulanglang, pandiningding

- gregoriovbituinjr.

08.28.2021

Diwang mapagpalaya

DIWANG MAPAGPALAYA

simpleng pamumuhay at puspusang pakikibaka

ang isinasabuhay ng tulad kong aktibista

patuloy na kumikilos at nag-oorganisa

tungo sa pagtatayo ng lipunang ninanasa

binabasa ang akda't kasaysayan ng paggawa

upang tuluyang tagpasin ang gintong tanikala

tungo sa adhikang pagbabagong mapagpalaya

tungo sa lipunang ang bawat isa'y maginhawa

tungo sa asam na lipunang walang mga uri

lipunang hindi hinahati, walang naghahari

ugat ng kahirapan ay pribadong pag-aari

nitong kasangkapan sa produksyon, dapat mapawi

lipunang bibigkis sa matinding pagkakaisa

ng sangkatauhan laban sa pagsasamantala

lipunang nakatindig sa panlipunang hustisya

at karapatang pantao, na pantay bawat isa

tara't magbasa ng mga mapagpalayang akda

tungo sa pagkakaisa ng uring manggagawa

upang lipunang hangad nila'y maitayong sadya

at lahat ay makinabang sa bunga ng paggawa

- gregoriovbituinjr.

08.28.2021

Nagdidilim ang langit

NAGDIDILIM ANG LANGIT

wala ang haring araw ngayong kinaumagahan

sapagkat nagbabadya ang malakas na pag-ulan

tingni ang langit, maulap, di lamang ambon iyan

magsahod ng timba't may tubig na maipon naman

atip ay tingnan, ang yerong bubong, baka may butas

tapalan agad kung mayroon man hangga't may oras

itaas ang dapat itaas, ang sako ng bigas

tiyaking maghanda sa loob, maghanda sa labas

tanggalin ang plastik sa kanal sakaling magbaha

aba'y kayraming basurang lululunin ng sigwa

upos ng yosi, plastik, basahan, lalong malubha

kung babara lang ito, sapagkat tao'y kawawa

dapat paghandaan ang pagsusungit ng panahon

upang di magbalik ang alaala ng kahapon

Ondoy, Peping, Yolanda, Milenyo, ang mga iyon

matitinding bagyong kayraming buhay na nilamon

- gregoriovbituinjr.

08.28.2021

Hanág

HANÁG

isa na namang salita ang nakita ko ngayon

lalo't kayganda ng mensahe't kahulugan niyon

na "dignidad at karangalan sa isang posisyon"

kaygandang salita sa kasalukuyang panahon

ano ba ang dignidad sa mga may katungkulan

upang di sila magmalabis sa kapangyarihan

at maiwasan ang paggawa ng katiwalian

bakit ba karangalan ay di dapat madungisan

HANÁG ang isa nating sukatan ng pulitiko

at sa susunod na halalan ay kakandidato

di walanghiya, talagang magsisilbi sa tao

oo, HANÁG ay isang sukatan ng pagkatao

ay, siyang tunay, ganyan kahalaga ang dignidad

upang mga kawatan sa gobyerno'y di mamugad

kung sira ang HANÁG nila, sila'y dapat ilantad

upang sa pamahalaan sila'y di magbumabad.

- gregoriovbituinjr.

08.27.2021

* hanág - [sinaunang Tagalog]: dignidad o karangalan sa isang posisyon, mula sa UP Diksiyonaryong Filipino, pahina 431

* pansining sa pagbigkas, ito'y mabilis pagkat may tuldik na pahilis sa ikalawang pantig, sa tapat ng titik a, na kaiba sa hánag na iba naman ang kahulugan

Ingat

INGAT

paskil na istiker sa motor ng isang kasama

ay talagang tagos sa puso't diwa pag nabasa

bagamat mararamdaman mo yaong pambubuska

gintong paalala iyon sa paraang makwela

nakasulat doon: "Ingat ka! Tanga ka pa naman!"

nakakatawa, pang-iinis o may kabastuhan

bagamat pabiro, mahalaga'y iyong ingatan

ang pagmomotor upang aksidente'y maiwasan

sa paalalang ito tayo'y nagpapasalamat

nang sa araw-araw na pagmomotor ay mag-ingat

pang-aasar man, ang mensahe nito'y anong bigat

minsanang sakuna'y baka habambuhay kang warat

sundin na lang ang mensaheng nakapaloob doon

estilo ng pagkasabi'y pagpasensyahan ngayon

ang mahalaga'y mag-ingat saan man naroroon

na anuman ang mangyari'y pag-iingat ang tugon

- gregoriovbituinjr.

08.27.2021

Panawagan ng maralita

PANAWAGAN NG MARALITA

tingni ang tarpolin nila't kaytinding panawagan

na talagang ikaw mismo'y mapapaisip naman

krisis daw sa pagkain, trabaho at kabuhayan

ay marapat daw lutasin para sa mamamayan

ipaglaban din ang karapatan sa makatao

at abot kayang pabahay, panawagang totoo

pahayag nilang ito'y tumitimo sa puso ko

na di sila dapat maapi sa panahong ito

kahilingan nila'y dapat lang ipaglabang tunay

lalo't panawagan nila'y di kusang ibibigay

tanging sama-samang pagkilos ang kanilang taglay

upang kamtin ang adhikang di basta nahihintay

magpatuloy kayo, maralita, sa inyong misyon

sabihin ang inyong hangad kung may pagkakataon

baka hiling n'yo'y ibigay agad pag nagkataon

tara't magbakasakali upang kamtin ang layon

- gregoriovbituinjr.

08.27.2021

* litratong kuha ng makatang gala noong SONA 2021

Ligtas na bakuna para sa lahat

LIGTAS NA BAKUNA PARA SA LAHAT

sinuman ay nagnanais ng ligtas na bakuna

tulad kong unang naturukan ng Aztrazeneca

kahapon lang, upang sa sakit ay makaiwas na

kaysa sa COVID-19 ay laging nag-aalala

kahit may nababalitang may namatay raw noon

matapos mabakunahan, iba'y may eksplanasyon

di kaya sa sakit niya'y mayroong kumplikasyon

kaya bago bakunahan, kayraming mga tanong

tungkol sa kalusugan mo't nararamdamang sakit

pinababasa ang papel, dito'y di pinipilit

kung sang-ayon ka sa bakuna'y pipirma kang saglit

at kung ayaw mo, karapatan mo'y maigigiit

"ligtas na bakuna para sa lahat" yaong hiyaw

ng maralita, panawagang di dapat maligaw

kundi sa awtoridad iparinig nang malinaw

upang pumanatag ang kanilang puso't pananaw

pasasalamat sa natanggap kong libreng bakuna

ngunit sana'y ligtas nga ang mga ito sa masa

malaman lang ng taong ligtas ito'y anong saya

nang COVID-19 ay ating malabanang talaga

- gregoriovbituinjr.

08.27.2021

* kuha sa sabay-sabay na pagkilos ng maralita nang magsimula ang lockdown sa NCR noong Agosto 5, 2021

Tula sa International Dog Day

TULA SA INTERNATIONAL DOG DAY

mabuhay ang asong alaga sa kinikilusan

matapang na bantay at tunay na maaasahan

saludo sa kanyang pagtitiyaga't katapatan

upang opisina'y talaga namang mabantayan

matalinong aso, minsang ako'y tulog sa opis

tahol ng tahol, ginising ako't akto'y kaybilis

pinapunta ako sa kusina't aba'y putragis

inaamoy niya ang gasul, naamoy ko'y labis

nakasindi pala't bukas ang gasul, ay nakupo

buti't alisto ang aso't ginising akong buo

isinara ko ang asul, tahol niya'y naglaho

kumawag-kawag ang buntot ng may buong pagsuyo

isa lamang iyan sa marami kong naranasan

na dinala niya ang tanggapan sa kaligtasan

ngayong International Dog Day, siya'y pagpugayan

tulad niya'y aktibistang nagsisilbi sa bayan

- gregoriovbituinjr.

08.26.2021

* litratong kuha ng makatang gala sa dating opisina ng manggagawa sa Lungsod Quezon

Pinagsanggunian:

https://www.thequint.com/lifestyle/international-dog-day-2021-history-significance-and-quotes

https://www.firstpost.com/world/international-dog-day-2021-history-and-amazing-facts-about-mans-best-friend-9914071.html

* History of International Dog Day

In the year 2004, the day was founded by animal welfare advocate and pet lifestyle expert, Collen Paige. He is also a conservationist, dog trainer, and author. The date 26 August was selected for International Dog Day because it was the first time when Paige's family adopted Sheltie; he was 10-years-old.

Along with International Dog Day, Paige also founded and observed many such days including National Cat Day, National Puppy Day, National Wildlife Day, and National Mutt Day.

Talahuluganan

TALAHULUGANAN

talahuluganan itong kayamanan kong sadya

pinag-ipunang bilhin at iniingatang kusa

nakalagak sa munting aklatan, nakakahanga

malaking tulong sa pagsasalin at pagmakata

di lamang simpleng sanggunian ng salita ito

kundi binubuklat ko ri't binabasang totoo

upang mapahusay pa ang mga bokabularyo

at magamit sa mga tula, sanaysay at kwento

lalo ngayong Buwan ng Wika, napakadakila

ng papel ng talahuluganan sa pagkakatha

lalo na sa paggamit ng katutubong salita

totoong kahulugan ay mabatid ng makata

samutsari ang paggamit sa wikang Filipino

tulad ng talahuluganan ay diksiyonaryo

ang talasalitaan naman ay bokabularyo

habang yaong talatinigan naman ay glosaryo

kayamanang talaga ang mga nasabing aklat

na sa tuwina'y sinasangguni ko't binubuklat

mapangmulat, ingatang mabuti't huwag malingat

at baka may magkainteres ay mawalang sukat

- gregoriovbituinjr.

08.26.2021

Una kong turok ng bakuna

UNA KONG TUROK NG BAKUNA

kahapon ay nag-text sa akin ang PasigBakuna

iskedyul ko'y kahapon ngunit kanina nagpunta

akala'y kaylayo ng Sagad ng tingnan sa mapa

tinanong ko sa kapitbahay, traysikel lang pala

alam ko, isang araw akong huli sa iskedyul

nagpunta na agad, kahit isang araw nang gahol

pamasaheng kwarenta sa traysikel ay ginugol

at masigla ko namang narating ang Sagad Hayskul

isang araw mang huli, ako'y inestima pa rin

binigyan ako ng papel upang aking sagutin

ilang tanong sa kalusugan at tungkol sa akin

walang pila, organisado, at mabilis lang din

ayon kay Doktora, ang bakuna'y AztraZeneca

kalooban ko'y handa na, sa papel ay pumirma

tinurukan ako ng maliit na heringgelya

na animo'y kasingliit lang ng bolpen kong Panda

matapos iturok, nilagay sa kahong maliit

ang mga heringgelyang pinanturok at ginamit

palagay ko, heringgelya'y di nila inuulit

isang heringgelya bawat tao, aking naisip

mabuti ang ganito't walang magkakahawahan

tanging pasasalamat ang nasa puso't isipan

sa susunod na iskedyul, sila'y magte-text na lang

para sa ikalawang bakuna'y maghintay lamang

- gregoriovbituinjr.

08.26.2021

Ang koleksyon ko ng Reader's Digest 2018

ANG KOLEKSYON KO NG READER'S DIGEST 2018

mahal ang Reader's Digest na bago, alam ko ito

presyo'y isangdaan siyamnapu't siyam na piso

subalit luma man nito, ang turing na'y klasiko

kaya mga lumang Reader's Digest ang binili ko

nang minsang dumalaw sa Book Sale, ito na'y nagmura

nabili kong tatlumpu't limang piso bawat isa

pautay-utay lang ang bili, una'y apat muna

sunod ay tatlo, sunod ay isa, muli isa pa

mula Enero hanggang Setyembre ang mga isyu

na pawang tatlong taon nang nakararaan ito

subalit di naluluma ang sanaysay at kwento

nananatiling napapanahon ang mga ito

siyam na isyu ang binabasa't nababalikan

samutsaring klasikong sanaysay ang nilalaman

kalusugan, karanasang personal, kasabihan

humour, kwentong trabaho, travel, trivia, puzzle, liham

kung siyam na isyung ito'y binili ko na noon

nasa isang libo't walong daang piso rin iyon

ngunit tatlong daan labinglimang piso lang ngayon

nakamura na rin ako kung suriin paglaon

lalo't Reader's Digest na'y kayamanang matuturing 

nitong tulad kong makatang wala sa toreng garing

malaman sa impormasyon, sa diwa pa'y panggising

salamat, Reader's Digest, babasahin kang kaygaling

- gregoriovbituinjr.

08.26.2021

Ang kalabasa

ANG KALABASA

iyang kalabasa raw ay pampalinaw ng mata

bakasakaling nanlalabong mata'y makakita

pampalinaw din kaya ng budhi ang kalabasa

lilinaw din kaya ang paghahanap sa hustisya

kalabasa, anang iba, sa mata'y pampatalas

upang makita ang mga pandaraya't padulas

ng mga trapong ang ugali'y kapara ng hudas

dinaan na sa lakas, dinadaan pa sa dahas

aba'y pag ginulay ang kalabasa'y anong sarap

bakit ba ito'y naging simbolo ng mapagpanggap

kalabasa'y dala sa pagkilos ng mahihirap

sa rali't sagisag na pinuno'y sero, kaysaklap

bakaw sa kapangyarihan kaya sero, butata

kayrami pang napaslang sa hanay ng maralita

walang due process of law, rule of law ay balewala

gayong dapat may konsensyang naglilingkod sa madla

ay, kalabasa, ikaw nga ba ang tamang simbolo

ng mga trapong sero sa karapatang pantao

kalabasang lunti, dilawang kalabasa'y ano

kalabasa'y pampalinaw ng mata ang totoo

- gregoriovbituinjr.

08.25.2021

* litratong kuha ng makatang gala noong SONA 2021

Ulam ko'y kamatis

ULAM KO'Y KAMATIS

ulam ko ngayon ay kamatis

na pampaganda raw ng kutis

kaya pala mukha'y makinis

walang tagyawat na matiris

sa tulong pala ng kamatis

ay napaibig ko si misis

mga tula ko'y walang mintis

kaya panay siya bungisngis

salamat sa iyo, kamatis

ang mukha ko'y naging malinis

lumakas pa ako't bumilis

sa hirap man ay nagtitiis

kumikilos tungo sa nais

na lipunang walang kaparis

lipunang walang bahid dungis

lipunang papawi sa burgis

bagamat bulok na kamatis

sa mukha ng trapo'y ihagis

tuloy sa pakikipagtagis

kahit na ulam ko'y kamatis

- gregoriovbituinjr.

08.25.2021

Pagiging patas

PAGIGING PATAS

nakikiisa ako sa bawat pakikibaka

ng mga maliliit, manggagawa't magsasaka

upang kanilang kamtin ang panlipunang hustisya

patungo sa lipunang walang pagsasamantala

pinapangarap ko'y isang lipunang makatao

kaya ko niyakap ang mapagpalayang prinsipyo

sinusuri't ipinaglalaban ang bawat isyu

upang tiyaking patas ang kahihinatnan nito

parehas at makatarungan ang nasang magawa

pangarap na maitayo'y lipunang manggagawa

kung saan pakikipagkapwa ang nasa't adhika

walang pang-aapi't pagsasamantala sa dukha

pagkat aktibista akong nangangarap ng patas

na lipunang walang kaapihan at pandarahas

kaya sa gatla ng noo ko'y iyong mababakas

ang pilat sa mga danas ng digmang di parehas

kawalang hustisya ba'y dapat hugasan ng dugo

upang pang-aapi't pagsasamantala'y maglaho

o sa anumang laban ay patas ding makitungo

kahit kaharapin pa'y burgesyang tuso't hunyango

- gregoriovbituinjr.

08.25.2021

Paslit

PASLIT

bagamat hitik sa bunga ang puno ng kalumpit

na paborito namang pitasin ng mga paslit

subalit kung mahuhulog sa puno'y anong sakit

kahit kapwa batang nakakita'y napabunghalit

bagamat paslit dahil sa kamurahan ng gulang

bawat isa sa kanila'y may angking karapatan

karapatan nila ang mag-aral sa paaralan

subalit di ang magbungkal sa mga basurahan

sa murang edad ay karapatan nilang maglaro

mag-aral at maglaro silang may buong pagsuyo

tatanda agad kung nagtatrabahong buong puso

gayong bata pa, ang kabataan nila'y naglaho

kung ang bunga ng kalumpit ay madaling mapitas

yaong batang nagtratrabaho na'y malaking bigwas

sa kanyang pagkabatang di na niya nadadanas

bata pa'y nagtrabaho upang makabiling bigas

protektahan ang bata, pagkabata'y irespeto

huwag hayaang sa maagang gulang magtrabaho

ngunit kung dahil sa hirap, gagawin nila ito

karapatan nila bilang mga bata'y paano?

- gregoriovbituinjr.

08.24.2021

* mga litrato mula sa google

Pagbati

pagbati ng makata'y maligayang kaarawan

asam kong lagi kang nasa mabuting kalagayan

di nagkakasakit, malusog ang puso't isipan

kumikilos pa rin kahit nasa malayong bayan

lalo na't matibay kang moog sa kilusang masa

habang nagpapatuloy pa rin sa pakikibaka

sa dukha't manggagawa'y patuloy na nakiisa

upang uring proletaryo'y umagos sa kalsada

maganda ang iyong tinuturo sa kabataan

nang sistemang bulok ay kanilang maunawaan

upang lipunang ito'y kanilang maintindihan

balang araw, sila'y magiging manggagawa naman

muli, maligayang kaarawan, aming kasama

tuloy ang laban, kamtin ang panlipunang hustisya

- gregoriovbituinjr.

08.24.2021

Imaginary number sa sudoku

IMAGINARY NUMBER SA SUDOKU

sa matematika o sipnayan ay may konsepto

ng imaginary number, malaking tulong ito

sa mga aplikasyon sa pamumuhay sa mundo

mahalaga ring gamitin sa abanteng kalkulo

tinatawag din ito sa iba namang termino

na complex number o masalimuot na numero

na di agad maunawa kundi aaralin mo

nasok sa isip ko nang naglalaro ng sudoku

tulad ng sudoku sa halimbawang naririto

sa unang kahong siyaman ay makikita ninyo

na dapat ilagay sa blangko'y dos, syete, o kwatro

ngunit dos at syete'y di maaari sa ikatlo

o ikatlong blangkong kahon na kwatro ang sagot ko

kwatro'y tinuring na imaginary number dito

at naging mabilis na ang pagsagot ng sudoku

sa ikalawa'y dos agad, mabubuo na ito

kaya sa sipnayan muling naging interesado

dapat magbasa-basa muli't ako'y magrepaso

ang complex number, ang number theory't tulad nito

sa sariling wika'y ipaliwanag ang konsepto

mapagaan ang sipnayan sa unawa ng tao

na maaaring pasanaysay maisulat ito

o sa patula kong paraan o maikling kwento

magpaliwanag ng sipnayan ngayon na'y misyon ko  

- gregoriovbituinjr.

08.24.2021

* ang tatlong larawan ay ini-screenshot ng makata habang naglalaro ng sudoku

Pananghalian sa opis

PANANGHALIAN SA OPIS

simpleng ulam na vegetarian sa opis kanina

pampahaba raw ng buhay ang talong, LONG talaga?

may sawsawang bagoong, gulay ang ulam tuwina

pati pampalusog ding sitaw, okra't kalabasa

marahil pampapayat din dahil wala nang karne

na pag nagkasakit, tititig na lang sa kisame

ang pasya kong maging vegetarian ay pasakalye

tungo sa kalusugan nang may mabuting diskarte

di naman ito salungat sa tutugpaing buhay

na malusog ang puso't diwa kahit nagninilay

habang ang diwa ng Kartilya'y isinasabuhay

at kasama ng obrerong nagkakaisang hanay

kumakain ng gulay at nakikibaka pa rin

vegetarian na'y budgetarian pa ang bulsa't turing

upang lumusog ang sinumang aktibistang gising

upang di sa sakit bumagsak, tuloy ang layunin

- gregoriovbituinjr.

08.23.2021

Paghihintay

PAGHIHINTAY

gutom ang inabot ko sa mahabang paghihintay

mahirap basta umalis sa pinuntahang hanay

at wala ring malapit na pagkakainang tunay

kahit sana may magbenta ng biskwit o tinapay

sa bawat paghihintay ay dapat magpakatatag

sikmura na'y humahapdi sa pilang di matinag

ang paisa-isang usad ng pila'y pampalubag

ngunit kagutuman ay sadyang nakapangangarag

kalahating oras, isang oras na nakapila

ang dalawang oras na pila'y kakayanin pa ba

di ko na kaya ang gutom, ako'y nakiusap na

sa katabi, ah, upang makalamon na talaga

naghanap ng makakainan sa dako pa roon

wala, hanggang ako'y lumabas sa pasilyong iyon

may vendor, walang kanin, ulam, biskwit ang mayroon

kaya biskwit ang inalmusal sa tanghaling iyon

aral: huwag kang aalis nang wala pang almusal

agahan ang gising, magluto, kumain, dumatal

nang maaga sa pupuntahan, huwag matigagal

kanina, nakuha rin ang hinintay kong matagal

- gregoriovbituinjr.

08.23.2021

Pighati

PIGHATI

di ko sukat akalain ang pighating nadama

ng inang lumuha dahil sa kawalang hustisya

aba'y paano pa kaya kung aktwal kong nakita

ang karumal-dumal na krimeng matutulala ka

pinupuntirya na ba nito'y ating katinuan

na maging katarungan ay di na pinapanigan

lalo't mga pagpaslang na'y dulot ng kabaliwan

pumapaslang alang-alang daw sa kapayapaan

imbes na sa katarungan at karapatang pantao

nakatutok ang rehimeng dapat nagseserbisyo

sa mga pagpaslang na umabot ng libu-libo

di na dumaan sa proseso o due process of law

hustisyang nakapiring kaya'y anong itutugon

sa nangyayaring karahasan sa ating panahon

katarungang hanap ay huwag sanang maibaon

sa limot o sa libingang nasa dako pa roon

- gregoriovbituinjr.

08.23.2021

Kerima

KERIMA

ipinangalan siya sa bantog na manunulat

at sa isang aktibistang nagsakripisyong sukat

isa rin siyang makatang tula'y dapat mabuklat

upang basahin paano namulat at nagmulat

ayon nga kay Robert Frost sa tulang The Road Not Taken

na kamakailan lamang ay aking isinalin

nilandas niya ang lansangang bihirang tahakin

upang paglingkuran ang masang dapat palayain

ang kanyang naging buhay ay kapara rin ng tula

minsan ay nakabartolina sa sukat at tugma

may malayang taludturan din tungo sa paglaya

habang tapat na naglilingkod sa bayang dalita

di man kilalang personal, nababasa ko siya

dahil kanyang mga akda'y kung saan naglipana

at nang nangyari sa kanya sa balita'y nabasa

ay tanging paghanga ang maiaalay sa kanya

bilang makata'y pagpupugay ang tanging paabot

sa kanyang pagkamatay na lipunan ang kasangkot

siyang hangad na ituwid ang sistemang baluktot

at palayain ang bayan mula sa mga buktot

- gregoriovbituinjr.

08.22.2021

* litrato mula sa google

Kamulatan

KAMULATAN

kung kumportable lang sa buhay, di makasusulat

ano pang dahilan ng pagkathang walang katulad

ano pang rason ng manunulat upang manumbat

at mga kabulukan ng lipunan ay ilahad

kung kumportable lang sa buhay ay di na kakatha

dahil nasa toreng garing na ako't pinagpala

ano pang makikita ko roong dapat itula

kundi purihin lang ang yaman at mga kuhila

di man kumportable, manggagawa't dukha'y karamay

kaya sa paligid ko'y laksang paksa'y nahalukay

naisusulat ang dusa't lungkod sa simpleng bagay

tulad ng mga sugat na sa puso nakaratay

nararamdaman ng makata ang hikbi't hilakbot

sa bulok na sistemang ngitngit ang idinudulot

paraan niya'y ilantad ang sistema ng buktot

linisin ang dumi't ituwid ang mga baluktot

humihikbi ang loob, sa labas ay nakangiti

ganyan ang makatang nakatawa ngunit may muhi

sa sistemang bulok na ayaw niyang manatili

lalo't pagsasamantala ng tusong naghahari

mahirap pa sa daga ang kalagayan sa lungga

at sa mundong iyon ay nalilikha ang paglaya

na sa lipunang pangarap ay mulatin ang dukha

at panlipunang hustisya'y itaguyod sa madla

- gregoriovbituinjr.

08.23.2021

Kape tayo

KAPE TAYO

aba'y tara, tayo muna'y magkape

habang nagpapahinga ngayong gabi

at mag-usap anong tamang diskarte

sa pagtapal ng butas sa kisame

sapagkat nagbaha na naman dine

magkape habang pinagninilayan

ang mga nakaraang karanasan

pag-usapan ang mga tunggalian

sa pagitan ng unyon at kawatan

at nangyayari sa pamahalaan

dapat na may kongkretong pagsusuri

sa mga usapin at katunggali

bakit sa lipunan, may naghahari

may nagsasamantala't mga uri

kahirapa'y paano mapapawi

salamat sa pagdamay mo sa akin

ngayong gabing utak ko'y pagod na rin

dahil sa kasawiang dapat dinggin

upang lumuwag ang nakahihirin

at malutas na ang alalahanin

- gregoriovbituinjr.

08.22.2021

Sahod-ulan

SAHOD-ULAN

umulan ng malakas kaninang bago maggabi

nagbaha na naman, may butas pa rin sa kisame

kahit inayos na ito ng isang anluwage

kailangan muling maglampaso sa tabi-tabi

subalit sa kusina'y nakapagsahod ng ulan;

anang isang manunulat na aking kaibigan

na namayapa na'y maling tawaging tubig-ulan

dahil tubig na ang ulan, siya'y naunawaan

heto, may naipong sahod-ulan sa palanggana

bagamat pag-ipon nito'y di ko sadyang talaga

naiwan lang ang palanggana matapos maglaba

napuno na pala ng tubig nang aking makita

salamat sa sahod-ulan, mayroong magagamit

di sa pagluto, kundi paglampaso't pagliligpit

ng maraming kasangkapang lilinisin kong saglit

tulad ng baso't pinggan, kubyertos, basahan, damit

ganyan na ang aking gagawin, akin nang sinadya

magsahod-ulan, mag-ipon na ng tubig sa timba

tulong na ito ng kalikasan sa manggagawa

kaya kalikasan ay alagaan nating pawa

- gregoriovbituinjr.

08.22.2021

Ermitanyo

ERMITANYO

kaytagal kong ermitanyo sa puso ko't hinagap

na tanging panitikan ang madalas na kausap

kahit matao sa rali'y bihirang pangungusap

ang sinasabi nitong bibig sa nakakaharap

para bang laging nangangarap sa harap ng masa

bagamat sumisigaw ng panlipunang hustisya

maging karapatang pantao'y inihihiyaw pa

subalit ermitanyong masaya sa pag-iisa

hanggang maging taong opisina, mag-isa pa rin

sa malaking lamesa'y nagsosolo kung kumain

kung anu-anong nasa paligid na'y papaksain

mag-isang lumilikha lalo't di mo kausapin

nasa daigdig ng panitikan ang puso't diwa 

ng ermitanyong itong nais maging manunula

ngunit sadyang makwento basahin mo lang ang katha

napakaraming sinasabi, lagi mang tulala

ganyan ang buhay ng ermitanyo sa opisina

mukhang kuntento't masaya, mukhang walang problema

bagamat may mga nakatagong sugat at dusa

na hanging amihan lang ang madalas makakita

- gregoriovbituinjr.

08.22.2021

Itigil ang demolisyon

ITIGIL ANG DEMOLISYON

nginig na pag narinig ang salitang "demolisyon"

nakakakilabot pag nawalan ng bahay ngayon

ang demolisyon ay giyera, digmaan paglaon

sa maralita, demolisyon ay matinding hamon

sadyang nakakataranta sa aba nilang buhay

pagkat sa demolisyon, isang paa'y nasa hukay

kaya pinaghahandaan ang sagupaang tunay

upang tuluyang ipagtanggol ang kanilang bahay

ngunit daanin muna sa maayos na usapan

dapat makipag-negosasyon sa pamahalaan

upang di matuloy ang demolisyon at digmaan

sa pagitan ng maralita't maykapangyarihan

dahil lalaban bawat maralitang may dignidad

pagkakaisa sa pagkilos ang dapat matupad

sana'y di na humantong pa sa demolisyong hangad

ng nagpapagibang sa dahas ay walang katulad

"Itigil ang demolisyon!" sigaw ng maralita

"Ang tanging nais namin ay buhay na mapayapa!

Ayaw naming maghanda sa pakikipagsagupa! 

Subalit di kami aatras kung hangad n'yo'y digma!"

- gregoriovbituinjr.

08.22.2021

* litratong kuha ng makatang gala noong SONA 2021

Kung may dinaramdam

KUNG MAY DINARAMDAM

di ko mabigkas yaong muhing sukat ipagdamdam

di masabi ang mga sugat na dapat maparam

torpe, kimi, mahiyain, aba'y kanilang alam

subalit minsan, pananahimik pa'y mainam

pagkat ayoko ring makasakit ng saloobin

ng aking kapwa, kaaway man siya kung ituring 

ah, mabuti pang sinumang maysala'y patawarin

kung wala namang krimen, nasaktan lang ang damdamin

sakaling dinanas mo'y pagkabigo sa pag-ibig

di mo pa lang nakita ang kahalikan ng bibig

balang araw, si Kupido'y sa iyo rin papanig

makikita mo rin siya't kukulungin sa bisig

kung sinuntok ka ng kaaway mo dahil sa utang

aba'y may utang siya sa iyong pagbabayaran

pag katipan mo'y sinalisihan ng kaibigan

aba'y tiyak na kandila ninyo'y magsosolian

kung sakaling may dinaramdam, subukang magsuri

kung may dinaramdam, paghilumin muna ang muhi

bawat kalutasan kasi'y pagbabakasakali

baka magpahilom lang ay panahon, di madali

kung gaganti'y pag-isipan nang apatnapu't apat

di rin naman madaling magpatawad kung mabigat

yaong pagkakasalang di mo akalaing sukat

isiping may solusyon at katapat din ang lahat

- gregoriovbituinjr.

08.22.2021

Kwentong gasul

KWENTONG GASUL

mula Nobyembre hanggang Hulyo ang itinagal din

ng pininturahan kong gasul dahil kalawangin

pina-refill ko, di pwedeng ipagpalit ang gasul

walang tatak, refill nga lang, di na ako tumutol

kinabukasan pa nang pina-refill ko'y nakuha

limangdaan dalawampu't limang piso'y halaga

sa opis ginamit, walong buwan bago naubos

kaytagal ding nagsilbi sa kagaya kong hikahos

nang naubos na ang pulang gasul, ginamit naman

ang reserbang asul na gasul na pinatago lang

ng isa pang samahang sa inupahan umalis

na gamit ko ngayon, kaysa sa gutom ay magtiis

paumanhin sa samahang iyon at nagamit ko

magkagayunpaman, isang ito'y utang sa inyo

na babayaran din pagdating ng tamang panahon

tanging pasalamat ang paabot sa inyo ngayon

datapwat mauubos na rin ang asul na gasul

may tatak, maipagpapalit ang gasul na asul

ang problema na lang, ang pambili'y saan kukunin

di ko pa nakuha ang salapi sa pagsasalin

di ako nag-aalala, tulad nami'y matatag

nakararaos, anumang problemang nakalatag

pagkat kami'y aktibistang Spartan, mandirigma

nagpapatuloy sa pagkilos, gasul man ang paksa

- gregoriovbituinjr.

08.22.2021

Lipunang pangarap

LIPUNANG PANGARAP

isang sistemang parehas, lipunang manggagawa

ang pangarap naming itayo, kasama ng dukha

kami'y kumikilos tungo sa lipunang malaya

at walang kaapihan, lipunang mapagkalinga

kaya ngayon ay nakikibaka kaming totoo

upang itayo'y asam na lipunang makatao

na walang pagsasamantala ng tao sa tao

kalagayan ng tao sa mundo'y sosyalisado

ang kapitalistang sistema'y tuluyang palitan

nang mas abante't patas na sistema ng lipunan

anupaman ang tawag, kung sosyalismo man iyan

mahalaga'y pantay at parehas ang kalakaran

papalit sa uring kapitalista'y ang obrero

na siyang mamumuno sa lipunang makatao

walang maiiwan, pulubi man, sa pagbabago

lahat ay nakikipagkapwa't nagpapakatao

kung ugat ng kahirapa'y pribadong pag-aari

di na iyan dapat pang umiral ni manatili

pagsulpot ng iba't ibang uri'y dapat mapawi

pakikibaka mang ito'y pagbabakasakali

iyan ang pangarap ko't pangarap din ng marami

kaya sa pakikibaka'y nagpapatuloy kami

upang sa kahirapan, ang tao'y di na sakbibi

may paggalang sa dignidad, bawat isa'y kasali

- gregoriovbituinjr.

08.21.2021

Sa gitna ng pandemya

SA GITNA NG PANDEMYA

patuloy pa rin ang makauring pakikibaka

ng manggagawa kahit nasa gitna ng pandemya

paano na ang bukas at kalusugan ng masa

ang mamamayan ba'y may nakukuha pang ayuda

gayunpaman, bilin pa rin sa atin ay pakinggan

alagaan ang pamilya't ang ating kalusugan

kumain ng gulay at magpalakas ng katawan

magbitamina, magpakatatag, magbayanihan

mag-face mask, mag-alkohol, laging mag-social distancing

mag-face shield tuwina't sa labas ay huwag alisin

pag-uwi, damit at sapatos ay agad hubarin

maghilamos, magbanlaw, bagong damit ay suutin

kung walang pupuntahan, huwag lumabas ng bahay

ibang-iba na ngayon ang kalakaran ng buhay

dahil sa pandemya'y nag-iingat na tayong tunay

sana lang, tama ang palakad nila't walang sablay

dahil pag walang trabaho'y tiyak na walang kita

dahil pag walang kita'y magugutom ang pamilya

dahil inaabot ng walang pera'y pagdurusa

dahil gutom ang dinaranas pag walang ayuda

ganyan dito sa lungsod, di tulad sa lalawigan

masikip, dikit-dikit sa lungsod at pamayanan

kaya kung di mag-iingat, baka magkahawaan

habang mayorya'y sakbibi pa rin ng kahirapan

- gregoriovbituinjr.

08.21.2021

* litratong kuha ng makatang gala mula sa mga nasaliksik na babasahin sa aklatan ng opisina ng paggawa

Babasahin sa paggawa

BABASAHIN SA PAGGAWA

kung mababasa lang ang lathalaing paggawa

baka naghimagsik na ang nagtatrabahong madla

laban sa sistemang pinaiiral ng kuhila

o mga taksil na tubo lang ang inaadhika

samahan sa paggawa'y patuloy na umiiral

habang lipunang pangarap nila'y pinangangaral

mula sa primitibo komunal, alipin, pyudal

at paano palitan ang sistema ng kapital

mayroong hanggang reporma lang ang inaadhika

animo'y pinakikintab ang gintong tanikala

nais ng marami'y rebolusyon ng manggagawa

at itayo ang isang lipunang mapagkalinga

ang mga araling ito'y dapat nating basahin

mga babasahin itong dapat nating aralin

at kung kaya, bawat manggagawa'y pagkaisahin

patungo sa lipunang makatao'y pakilusin

- gregoriovbituinjr.

08.21.2021

* litratong kuha ng makatang gala mula sa mga nasaliksik na babasahin sa aklatan ng opisina ng paggawa

Ang buwan ko'y Agosto

ANG BUWAN KO'Y AGOSTO

sinilang man akong Oktubre, buwan ko'y Agosto

pagkat Buwan ng Wika kaya ito'y pinili ko

di lang malapit sa puso't diwa ang paksang ito

kundi paksang tagos na tagos sa kalooban ko

ang buwan ng Agosto'y buwan din ng Kasaysayan

tinataguyod ko ang Kartilya ng Katipunan

aktibo ring kasapi ng grupong Kamalaysayan

o Kaisahan sa Kamalayan sa Kasaysayan

pagpapayabong ng wika'y tungkulin ng makata

kaya pag Agosto'y aktibo sa Buwan ng Wika

di man makadalo sa programa'y katha ng katha

nag-aambag ng katutubong salita sa tula

isinilang ang bansa nitong buwan ng Agosto

nang sedula'y pinunit ng mga Katipunero

hudyat ng pakikibaka ng karaniwang tao

upang kalayaan ng bayan ay kamting totoo

dalawang paksa, Buwan ng Wika at Kasaysayan

mahahalagang isyu sa tulad kong mamamayan

na kahit di Agosto'y sadya kong tinututukan

na bigyang halaga ang historya't wika ng bayan

sariling wika't kasaysayang tagos sa puso ko

bilang mangangatha ng tula, sanaysay at kwento

sa nakakakilala, ito ang masasabi ko:

ako man ay Pulang Oktubre, buwan ko'y Agosto

- gregoriovbituinjr.

08.21.2021